ආදරණීය දුවා දැරියනි, දෙමාපියෙනි, ගුරු තුමියනි

 

පුංචි දරුවන් රෝස මල් මෙන් නොවේ. සිනිදු පෙති රඳන රෝස මල් කැකුලුමය. ආදරණීය ගුරුතුමියනි, මේ පුංචි පාසල වෙත හිරු ලොවට එබී බලද්දී, කෝපි මල් සිනාවෙන් පැමිණෙන්නේ මේ රට අනාගතයේ භාර ගැනීමට සිටින දරුවන්ය.

ආදරණීය දෙමාපියනි,  මිනිසුන් විශ්ව ගම්මානය නමැති ලෝකයේ සැරිසරන්නට පෙරාතුව එයට මූලික පියවර තබන්නේ පාසල නමැති රිදී තෝතැන්නෙනි. එවන් තෝතැන්නකට එවන් වටපිටාවකට දරුවන් යොමු කිරීමට අවැසි වන්නා වූ කායික වූත් මානසීක වූත් ආරම්භයක් ලබා දෙනු ලබන්නේ ඔබේ දරුවා මෙතක් කාලයක් පිය නැගූ මේ පුංචි පෙරපාසල මගිනි.

වසර හතරක් හෝ පහක් වැනි කාලයක් ඔබේ තුරුලේම හැදී වැඩී හුරතල් වූ මේ පුංචි මල් කැකුලු සාමාජීය හා සංස්කෘතිමය වශයෙන් පුංචි පුංචි දෑ ඉගෙන ගත්තේ මේ පෙරපාසලෙන්. එහීදී පිටස්තර වැඩිහිටියන් හට ගෞරව කිරීම  එකිනෙකාට ආචාර සමාචාර කිරීම්  විවිධ අයුරින් දරාගැනීමට හුරුවීම අන් අයගේ ඇදැහිලි වලට  හැසිරීම්වලටද හුරුවීම පෙර පාසල මගින් ඉටුකිරීමත්  බොහෝවිට දෙමාපියන්ට නොදැනෙන නමුත් පුංචි පැටව් තමන්ගේ කායික මානසික තත්ත්වය දියුණුකරගෙන කෙනෙකු  ඒ දණ්ඩක් මතින් ජල පහරක් තරණය කරන්නාක් මෙන් මේ පුංචි දරුපැටවුන් හට මේ පෙරපාසල මතින්  පාසල නමැති මහා කඳු පන්තිය තරණය කරන්නට  හැකි වනු නොඅනුමානය.

කාලය ඉතා වේගයෙන් වෙනස් වෙලා තියෙනව. ඉස්සර අප අම්මාගේ හෝ සහෝදර සහෝදරියෙකුගේ සුලැඟිල්ලේ එල්ලී පෙර පාසල් මෙන්ම පාසල වෙතද පිය නැගුවේ  පා ගමනිනි. තාක්ෂණීක අතින් ඉතා සිඝ්‍රයෙන් දියුණු වූ  එහෙත් කාර්ය බහුල සමාජය ඉදිරියේ අද එසේ කිරීමට හැකියාවක් නැත්තේ දරුවන්ට පමණක් නොව අපටද ඉතා අනතුරු දායක නිසාය. විවිධාකාර දූෂිත වංචාකාරී ප්‍රෝඩාකාරී ඇතැමුන්ගෙන් මුළු මහත් සමාජයද දූෂිත වී ඇති බැවින් මල් කැකුලු රැක ගැනීම ඔබ සතු වගකීමකි.

වර්තමානයේ අප රටට උද්ගත වී ඇති අර්බුදකාරී තත්ත්වය හමුවේ දෙමාපියන්ගේ කාර්යබහුලබව නිසා සහ ඇතැම්විට නොසැළකිලිමත්කම නිසා පුංචි දරුවන් හා දෙමාපියන් අතර ඇති සබඳතාවය බොහෝ වශයෙන් ගිලිහී ගොස්  තියෙනවා. මේ නිසා බොහෝ විට දෙමවුපියන්හට තම දරුවන් පිළිබඳව සොයාබැලීමට මගහැරී ඇහිරී තියෙනවා. මේ නිසා දරුවන්ට හිමි දෙමාපිය සෙනෙහස අහිමිවීමෙන් ඔවුන්ගේ බාල කාලය මෙන්ම හුරතලයට ඉඩ ඇහිරි තියෙනව. යහපත් දරුවෙකු සමාජයට  දායාද කිරීමේදී   ශාරීරික මෙන්ම මානසික දියුණවද බලපානව. එහෙත්  තම දෙමාපියන්ගේ සෙනෙහස රැකවරණය අහිමි විමෙන් ඔවුන්  කුඩා කල සිටම  මානසික බිඳ වැටීමකට ලක්වෙනව. මේ නිසා දෙමාපියන්  තම දරුවන් වෙත තව තවත් සෙනෙහසින් ලංවීම තුලින් මානසික වශයෙන් නිරෝගිමත් අධ්‍යාත්මික වශයෙන් ශක්තිමත් ගුණවත් දරුවෙකු මේ සමාජයට බිහිකරදීමට  ඔබට හැකියාව ලැබෙනව.

ඉතින් පුංචි පුතේ දුවේ පුතාලගෙ දුවලගෙ නිර්මාණ නැටුම් සිංදු මම ගොඩාක් රස වින්දා. ඉතිං පුතාල දූල ලබන අවුරුද්දෙ ලොකු ඉස්කෝලෙකට යනව. ඉතිං දුවේ පුතේ එහෙදි ඔයාලට මේ ටීචර්ල වගේ ගොඩාක් හොඳ ටීචර්ල හම්බෙනව. තව අලුතින් ගොඩාක් යාලුවො හම්බෙනව. එයාලත් එක්ක එකමුතුකමින් සහයෝගයෙන් ආදරෙන් සතුටින් ටීචර්ලා කියන දේ හොඳට අහගෙන  හොඳට ඉගෙනගෙන රටට ගොඩාක් හොඳ වැඩදායක පිරිසක් වෙන්න ඕනෙ. එහෙම වෙනව නේද හොඳ දූල පුතාල. මං පුතාලට අපේ රටේ හිටිය ටිබෙට් කියන රටේ ඉඳල ආපු හාමුදුරුවන් වහන්සේ කෙනෙක් ලියපු ලස්සන කවි දෙකක් කියන්නම්. ඒ කවි දෙක ලියල තියෙන්නෙ මේ ඉන්න පුතාලටයි දූලටයි. ඔන්න අහගන්නකො.

 

තමන් ලැබූ දිවි පෙවෙතේ
කොටසක් රට සමය වෙතේ
පුද නොකළොත් නුඹෙන් පුතේ
මෙ ලොවට කිසි පලක් නැතේ

ජාතිය රන් විමනක් වේ
ආගම මිණි පහනක් වේ
එය රැක ගන්න‍ට මෙලොවේ
සමත් වෙතොත් පුත නුඹ වේ

ටක් ටොක් ටක් ටොක්

 

මුලු පරිසරයම එකම නිහැඬියාවකින් යටවී ඇත. ඝන අන්ධකාරයෙන් වැසී පවතින සප්ත මහා සාගරයෙන් ඔබ්බට පනින මූදු රැළි වෙරළ සිපගන්නා ඝෝර නාදය පමණක් විටින් විට ඇසේ.  එක් වරම මූදූ සිංහයෙක් ගොරවන සද්දයක් මට අල්ලපු කාමරයෙන් ඇසේ. විටින් විට කකුලුවෙකු  හුඇක් හුඇක් ගගා නගන කෙඳිරිලි හඬ අනිත් පැත්තේ කාමරයක් දෙසින්  ඇසෙන කළ මගේ දෙසවනට මී පැනි වක්කරන්නා සේය. රෑට බල්ලෝ නුබුරති. එහෙත් දිය හබරලයෙක් වෙරළ දිගේ එහෙට මෙහෙට දුවන ශබ්ධය මගේ ගතත් සිතත් පිනවාගෙන එහෙට මෙහෙට යන්නා සේය. මම මොහොතක් නිහඬව  උතුරු දිශාවට දෙකන් යොමා උන්නෙමි. ටක් ටොක් ටක් ටොක් හඬින් ශබ්දයක් ඇසුනි. ශබ්දය  එන්න එන්නම  තීව්‍ර විය. මම කොයිකටත් කියා නැගිට ගොස්  දොර මෑත් කර මුහුණ ඝන අන්ධකාරයට එබුවෙමි. දෙපාරක් තුන්පාරක් ඇස් පිල්ලන් ගැසුවෙමි. එක පාරටම කණා මැදිරියෙක් මා සිටි තැනින් මීටර් සියයක් පමණ දික් අතට පියාඹා ක්ෂණයකින් අහසට පැන නොපෙනී ගියේය. එහෙත්  ඌ ගිය පාර  එලියෙන් මගේ දෙනෙත් නිලංකාර විය. මගේ ඇස් ඇදුම් කන්නට විය. මම දෙනෙත් පියන් වසා මොහොතක් හිටි තැනම ගල් ගැසුණි. ටක් ටොක් ටක් ටොක්..නැවතත් එම සද්දය කන ලඟටම ඇසුනි. මම දෙනෙත් පියන් විවර කර බැලූවෙමි. මුහුදු අශ්වයෙක් පිට නැගී අසරුවෙක් විදුලි වේගයෙන් මා සිටි දෙසට ආයේය. මට විජයබා කොල්ලය මතක් විණි. මම වහ වහා ලඟම තිබු ගසකට පැන නැංගෙමි. මම දඩස් ගා බිම වැටුනි. මම අවට බැලුවෙමි. ලැප් ටොප් එක පසෙකට වීසි වී මම ඇඳෙන් බිමට ඇද වැටී ඇති හැටි දුටිමි.....කෝකටත් කියා ගෘෘප් කෝල් එකක්වත් අරගෙනදැයි කියා ගෘෘප් එකටත් මූණ ඔබා බැලුවෙමි...

 

ක්ෂිතිජයත් වී දැන් කලාවක්

දරාගන්නට හිතක් නෑ මට

දමා හදවත කෑලි කරලා

මහා තල්ගස් බිඳී වැටෙනව

රැල්ල වෙරළට දඟ කලාමත්

 

සීනු හඬ සවනතට වැටෙනව

හීනයකි ඒ දැකපු සවසක

වීර නෙතු යට කඳුළු පිරෙනව

කෙස් ගහක් විත් දඟ කලාමත්

 

පීරමින් මම ඈත බලනව

සීරුවට අවි අත තබාගෙන

ඈත නොපෙනී යන අපූරුව

ක්ෂිතිජයත් මට දැන්  කලාවක්

CLEAN SRI LANKA වෙනසක් වෙනුවෙන් වෙනසක්

 CLEAN SRI LANKA  යටතේ විවිධ වෙනසකම් සිදුවෙමින් පවතී. ඇතැමෙක් එයින් යහපතක් දකී. ඇතැමෙක් එය ඔවුන්ට පුද්ගලිකව එල්ලකල මරු පහරක් සේ දකී. ඕනෑම තීරණයක හොඳ නරක දෙක අඩු වැඩි වශයෙන්ද පවතී. කෙසේ නමුත් ක්ලීන් ශ්‍රී ලංකා ව්‍යාපෘතිය රටේ සංවර්ධනය කෙරෙහි යහපත් වූ සංකල්පයක්  යැයි මට හැඟේ. එමෙන්ම එහි වැඩි වශයෙන් දක්නට ඇත්තේ යහපත් දේ යැයි ද මම විශ්වාස කරමි. මෙවැනි දේවල් සිදු කරද්දී පුද්ගලික එදිරිවාදිකම්ද ඉස්මතුවීම වැළක්වීම ඉතාමත් දුෂ්කර කාර්යයකි. 

වසර ගණනක් ජනතාවගේ සිත් සතන් තුළ මුල් බැසගෙන ඇති සංකල්පයන් වෙනස් කිරීම ඉතාමත්ම අපහසුය. එහෙත් එහි මූලයන් ඇද්දවීමට සැලැස්වුවහොත් මිනිසුන් ඒ තුළ රැඳෙනු ඇත. සිදුව ඇත්තේ අලුත් ක්‍රමයකට මිනිසුන් හුරු කරවා ගැනීමේ අපහසුතාවය. පැළයක් රෝපණය කර එය වර්ධනය කිරීමට එයට අවශ්‍ය හිරුඑළිය, ජලය, පොහොර සපයන්නා සේම ක්ලීන් ශ්‍රී ලංකා ව්‍යාපාතිය කිරීමේදී මහජනතාව තුළද එවැනි තත්ත්වයක් ඇති කළ යුතුය. හැමදාම කුඹුරට යාම තුළිනුත්, කටහඬ ඇසීම තුළිනුත් විශාල අස්වැන්නක් ලැබෙන බව පුරාණ ගොවියන් දන්නා කරුණකි. ඒ අනුව මෙවැනි ව්‍යාපෘති සඳහාද පුරාණ මිනිසුන්ගේ ක්‍රියාකාරකම් ආදර්ශයට ගත හැකිය. ක්ලීන් ශ්‍රී ලංකා අප්‍රසන්න වීම නොව ප්‍රසන්න වන ආකාරයට කටයුතු කළ යුතුය.

සියලු දේවල් සිදුකරනු ලබන්නේ පිටසක්වල වෙසෙන ජීවීන් කොට්ඨාශයකට හෝ විදේශයක ජීවත්වන ජීවීන් කොට්ඨාශයකට නොව රටේ අති බහුතරයක් ඡන්දය ලබා දුන් පිරිසක් සිටින රටකටය. ආණ්ඩුව අපට අවශ්‍යය යැයි තම ඡන්දය දුන් පුරවැසියන් සිටින රටකටය. ඉතා අඩු කාලයකින් ජරාජීර්ණ වූ යාන්ත්‍රණයක් වෙනස් කළ නොහැකිවා සේම එය ආණ්ඩුව පත් වී ඉතා අඩු කාල සීමාවකදී  සිදු නොකල හැකි බවද ඡන්දය දුන් ඒ සියලු දෙනාමද හොඳින්ම දන්නා කරුණක් මෙන්ම,  සමාජීය, සංස්කාතික මෙන්ම ආර්ථික වශයෙන්  සංවර්ධිත ලස්සන රටක් බලාපොරොත්තුවෙන්  එම මහජනයා ඉතාමත් ආයාසයෙන් ඒ සියල්ල ඉවසා දරාගෙන සිටී. 

ආණ්ඩුවකට ඉතා කෙටිකාලයකින් මෙරට සුර පුරයක් කිරීමට අවශ්‍ය වෙනස සිදු කිරීමට නොහැකිවා මෙන්ම, විවිධ මානසික මට්ටම් වලින්, අධ්‍යාපනික මට්ටම්වලින්, බුද්ධි මට්ටම්වලින්, සමාජයීය මෙන්ම සංස්කෘතික , ආර්ථික වෙනස්කම්වලින් පිරුණු  ජනතාවක් සිටින රටක, ඔවුන් මත මෙවැනි ඉක්මන් වෙනස්කම් කිරීමට යාම තුළ යම් ප්‍රතිවිරෝධයක් මතු වීම ස්වභාවිකය. තේරුම් ගත යුත්තේ වෙනස සිදු කරන්නේ සෑම අතින්ම ඌණ සංවර්ධිත රටකට මිස සංවර්ධිත රටකට නොවන බවයි. 

රට සංවර්ධනය වන විට එය අවිඥානකව  මහජනයාට සංජානනය වේ . ජනතාවගේ පහසුව සැකසීම වෙනුවෙන් කරනු ලබන වෙනස්වීම් සඳහා ජනයා විරෝධතා නොදක්වයි. එහෙත් ජනතාවගේ එදිනෙදා ක්‍රියාකාරකම් කෙරෙහි බලපෑමක් එකවරම සිදුවීමේදී ඒ සඳහා ප්‍රතිවිරෝධතා දැක්වීම අසාමාන්‍ය නොවන බව අවබෝධ කරගත යුතුය.

රටේ අස්සක් මුල්ලක් නෑරම කුණු කඳු වලින් ජරාජීර්ණ වී ඇත. තැන නොතැන බලා කාරා සෙම සොටු කෙල ගසන මිනිසුන් අප කාට වුව සිය දහස්වර මුණ ගැසී ඇත. දහස් ගණනින් වියදම් කර ආහාර වේල් රැගෙන අනුභව කොට ඉතිරිවන ඉඳුල් කාර් රථයේ ජනේලයෙන් මහ පාරට විසිකර දමන මහත්වරුන් යැයි සම්මත, අසම්මත තිරිසනුන් දැක නොතිබේද? CLEAN SRI LANKA  ක්‍රියාවක් නොව සංකල්පයකි. සියල්ල සංකල්ප මත රැඳී තිබේනම් ඒ සංකල්පයට ගරු කළ යුතුය. එම සංකල්පය ක්‍රියාත්මක කිරීමේදී  ටොෆි කොලයක්වත් මහපාරේ නොදැමිය යුතුය. ඒ තැනට මහජන සන්තානය වෙනස් කළ යුතුය. එය එකවර කිරීමේ අපහසුතාවය, සංකල්පමය වශයෙන් නොදියුණු . ග්‍රාම්‍යයත්වයෙන් පිරි, රටවැසියන් පිරිසක් ජීවත්වන රටකට සිදු කල නොහැකිය. දූපත් මානසිකත්වයෙන් මිදී නොව සැබවින්ම අප දූපතක ජීවත්වනවා යැයි සිතා මේ දූපත ආරක්ෂා කර ගැනීමට කටයුතු කළ යුතුය. දුරාතීතේ පටන් මේ දූපතේ පැවතුණු, තවත් පවතින සාර ධර්ම සිරිත් විරිත් ඉදිරියටත් ආරක්ෂා කර ගැනීමට සුපිරිසිදු ශ්‍රී ලංකාවක් පැවතිය යුතුමය. 

අපි අතීතයට දොස්  නොපවරා, සම්ප්‍රපලාඵ නොදොඩා ඉවසීමෙන් ශ්‍රී ලංකාව පිරිසිදු කර ගත යුතුය. මහජනයා මෙතෙක් කාලයක් නිහඬව  ඇතැම් දේවල්  බුක්ති වින්දේ, වැරැදි හෝ නිවැරැදි යන සංකල්පයන් පිළිබඳ අබමල් රේණුවක තරම්වත් දැනීමක් ඇතිව යැයි මට නොහැ‍ඟේ. එහෙත් හදිසියේ ඒවා වැරැදි යැයි හංවඩු ගැසීමෙන් ඇතැමුන් පුදුමයට පත්වනු ඇත. සාධාරණ වූ මනසකින් බැලූ කළ ඒවා වැරදිය. එහෙත් මෙතෙක් කාලයක් පැවතුනි. ඒවා හදිසියේ මුලිනුපුටා දමන්නට වෙර දැරීමෙන් ඔවුන් තුළ වෛරයක් පිළිකුළක් ඇති වනු වැළක්විය හැකිද? එසේ නොකොට ක්‍රම ක්‍රමයෙන් ඔවුන් වෙනස් කිරීමට කටයුතු කළ යුතුය යන්න මාගේ දැක්මයි. එයින් මහජනයා තුළ වෛර සිතුවිලි වෙනුවට පාලකයා කෙරෙහි ප්‍රශංසාත්මක සිතුවිලි උපදී.

CLEAN SRI LANKA  ව්‍යාපෘතිය ආරම්භ කිරීමට තවත් හොඳම පැත්තක් වන්නේ මහජනතාවගේ සනීපාරක්ෂාව ඉහළ නැංවීමයි. මේ වෙනුවෙන් සමස්ථ ශ්‍රී ලංකාවේම වැසිකිලි කැසිකිළි පද්ධතිය පිරිසිදු කළ හැකිය. මේ සම්බන්ධයෙන් සමාජය තුළ, ආණ්ඩුව කෙරෙහි ප්‍රසාදයක් මිස  ප්‍රතිවිරෝධාකල්ප පැන නොනගී. ශ්‍රී ලංකාවේ ප්‍රසිද්ධ ස්ථානයන් හි ඇති වැසිකිළි කැසිකිලි පද්ධතිය ගැන කතා පවා කිරීමට නොහැකිය. ඒවා තුළට යෑම පවා අප්‍රසන්නය. රූප හඳුනන, අකුරු කියවිය හැකි කුඩා දරුවෙකු රැගෙන ඇතුළට යාමට නොහැකිය. ඒවා තුළ  කැත කුණුහරුප අප්‍රසන්න දේවල් ලියා ඇත. ලිංගික ක්‍රියාවන් සිදු කරන ආකාරය චිත්‍රනය කර ඇත. මේ තත්ත්වය වෙනස් කළ යුතුය. එසේ වෙනස් කිරීමටනම් වෙනස්කළ යුත්තේ මොනවාද, කොතනින්ද යන්න ඒ සම්බන්ධ ප්‍රවීණයන් අවබෝධ කර ගත යුතුය. පර්යේෂණ කළ යුතුය. ක්‍රියාත්මක කළ යුතුය. 

හදිසි විය යුතු නැත. අත්දැකිම් ලැබෙන්නේ අවසානයටය. පැසසුම් ලැබෙන්නේ පසුවටය. සියවතාවක් සිතා කරන දෙය නිවැරැදිව කළ යුතුය. කළ දෙය නිවැරැදිද වැරැදිද යන්නද තීරණය කරන්නේ මහජනතාවය. සිරකරුවන්ද මිනිසුන්ය යනුවෙන් පවසනු මා අසා ඇත. කිව යුත්තේ ආණ්ඩු පත් කරන්නේත්, ආණ්ඩුවට පැසසුම් එක් කරන්නේත්, ක්ලීන් ශ්‍රී ලංකා  හෝ ඉදිරියට ක්‍රියාත්මක කරනු ලබන රට නංවාලීමේ  ව්‍යාපෘති  තේරුම් ගැනීම නොගැනීම මත ප්‍රතිවිරෝධතා දක්වන්නෝද මිනිසුන්ය යනුවෙනි. විද්‍යාව හා තාක්ෂණය දියුණු කිරීම පිණිස විවිධ පර්යේෂණයන් සිදු කරන්නා සේම, මානුෂ  සම්පත උපයෝජනය කර ගැනීම පිණිස මානව සම්බන්ධතා කෙරෙහි පර්යේෂණය  සිදු කිරීම තුළින්  වඩා වටිනා ප්‍රතිලාභ හිමිකර ගැනීමට  හැකිය යන්න  මගේ හැඟීමයි.