මේ මට පේන හැටි

පෙර රජ දවස සිට  එන හොද සිරිතක්ය
කවුරුත් එක වගේ නැත කිසි වෙනසක්ය
ඇද්දිලි කැපිලි ගෙරවිලි නම් රකුසෙක්ය
උෟ නැති එකෙක් මිහිපිටනම් දෙවියෙක්ය

එකෙකුගෙ කීම තවකෙකු ගරහනා ලොවේ
අද කාටවත් නම් මෙය පුදුමයක් නොවේ
මහ සග රුවන පෙන්වයි එඩි බලය ජවේ
ලොකු මැරකමකි තවකෙකු හට මෙහෙව් ලොවේ

පෙර පිනකින්ය ලැබුනේ කට කටකාර
ඒකෙන් පනී අදහස් ගොන්නක් මාර
කරමින් එකෙක් නිරුවත් කර ලෙස වීර
සිටියත් නොම දැනේ එන පරලොව පාර

අත්තා මුත්ත මී මුත්තාගෙන් ලැබුණු
දේපළ මොටද මම පුස් මිනිසෙකි දැමුණූ
ගැහි ගැහි ඉන්න දුප්පත් වැස්සෙන් තෙමුණු
උන්හට පුදමි මට කුමටද රජ ඔටුණු

යැයි තවඑකෙක් බෙරිහං දෙයි රට මැද්දේ
දුප්පත් එවුන් ටික ඌ පස්සෙන් ඇද්දේ
රැවටිලි කපටිකං මේ නැත හිත් වැද්දේ
යම රජු අපායේ ඇත කරමින් සද්දේ

ලැබුණ මුත් මිලියන ගණන් මහ දනන්ගේ පොදු වැඩට යෙදුමට
ඒව වියදම්  වුණේ මහතුනි බට දෙකේ පාලම්ද තැනුමට
ලෝකෙ හිනැහෙයි ගම්මු වැළපෙයි කවුරුවත් නැත නුඹට රිදුමට
එහෙත් ඉන්නව සොහොන් පිටියේ නුඹ වගේ උන් ගන්න පොලොවට


========මතු සම්බන්ධයි=========